zelda 薩爾達傳說 - 夢幻之砂時計 流程攻略 (一)

流程攻略 (一)

1.一開始同個老伯傾計 然後就可以入樹林 但係一見到有怪出現就會提示你拎番把武器先

2.跟住就可以番去阿伯屋右邊個山洞 洞裡面度門有個謎題 提示係問你海邊有幾多棵椰樹 去數完番黎將個數字寫番落個木牌就可以開門拎劍 答案係:7

3.然後可以去樹林裡面個山洞 山洞裡面有一處有4個把手 要跟住次序黎拉 第一個提示係話左邊第2個最先拉 第二個提示話左邊第1個係第二 右邊第2個係最尾 所以答案係:2143

4.穿過山洞去港口搵船長 但係搵唔到 於是去酒吧打聽 原來佢去左海王之神殿

5.上面出村去海王之神殿 見船長被困 衝去佢左上位置打個水晶救佢 然後搵佢傾計拎條鑰匙 佢會拜託你搵張海圖

6.再衝去地圖左上角打水晶 然後盡快衝去右上打另一粒 就可以打開中間度門拎到海圖

7.番去港口搵船長 劃下海圖右下角個島可以發現標記 然後就可以出海 先去正下面標記所在既火之島

8.島上有個女占卜師 去到佢屋既地牢 有怪打 打完去調查度門 隻妖精提示你門後好似有人 叫你嗌下 你就向住度門對住個mic嗌一聲(或者吹一吹)就會有劇情

9.占卜師會叫你睇下門旁既一張地圖 然後你要去搵呢個島上面既三個火台 將佢地位置mark低 再番黎去地牢張圖到mark番同樣既位置就可以救番個占卜師 然後可以上山

10.山頂位置有個碑提示你要吹熄d蠟燭 所以就去吹熄神殿門口兩枝蠟燭 跟住就入到火之神殿

11.火之神殿裡面要留意沿途牆上既提示牌 最好睇完mark番落地圖啦 活用呢度拎既回力標黎解謎 其中一個謎題就係要你用回力標順序打番4粒水晶

12.呢度既boss係個法師 會分身 要用回力標將佢地三個順住123(角)串埋就會合番體 趁呢個時侯狂打

13.打完拎到隻新妖精就可以番去占卜師度傾計 再番去第一個島再挑戰海王之神殿

14.入去拎左上層個砂漏 然後入下層 有左隻新妖精就可以開到之前正中間度門 呢度要注意有時間限制 唔好俾d劍士發現不幸被發現就行去d閃閃既地方(遊戲裡稱為聖域)度避離 呢d聖域除左d劍士入唔到之外 你企係度d時間都唔會扣既要活用(途中你會見有d機關例如牆上既眼,類似老鼠洞既物體 一概不理 因為你暫時未拎到相關物品) 繼續走到盡頭就會拎到第二張海圖

15.拎完海圖要吹走d沙就可以發現標記 然後就出發去大炮島 位置係一開始個島既左下 入屋見到個高佬 傾完計會開左度木門俾你 沿路落去 穿過山洞到島另一邊 沿途要活用炸彈花炸開晒d碎石頭 兜完一圈從間屋另一個門口入去 就可以搵到個矮仔老闆同佢買枝船炮

16.出發去北面 但係有龍卷過唔到 於是向左駛去山壁度 會發現有幾座山可以用大炮打爛 駛入去會發現幽靈船 聽佢指示一直追到上上面個地圖雖然大霧都要一直跟住架船 追到咁上下 會有劇情話已經俾隻幽靈船走甩左(幽靈船會係海圖上消失) 而自己架船亦會因為個迷霧陣被送番轉頭呢個時侯就可以番落下面地圖 去左下角既島

17.呢度打聽到島上住左一個探險家 佢曾經突破過個迷霧陣 於是去最右邊間搵佢 但只係見到佢個仔 佢話俾你知佢老豆有個秘密地方叫你搵下

18.出屋入旁邊山洞 山洞裡會搵到一個鏟 穿過山洞 會見到兩個航行日誌石碑 將碑既位置mark低 連埋村裡面兩個都mark埋 共四個

19.mark好之後將四個位置兩個兩個咁連埋成一個交叉 去交叉點(確實地點係o係正一棵樹下) 掘就可以發現個探險家既秘密地方 裡面有迷霧陣既行法 要記低係海圖上 之後可以跟佢咁行衝過迷霧陣去到風之島

20.風之島要利用風起既時候順風跳過一d比較遠既地方 某d地方亦要利用鏟將風口位挖出或者埋上 見到有提示板時要跟佢mark低 其中一度提示係話要令圖中三個地方有風 於是就去到有記號既三個風車面前吹郁佢(吹個mic) 咁就可以打開機關入風之神殿

21.風之神殿主要既謎題都係集中到利用風同炸彈 例如係借風力跳過一d比較遠既地方或者吹郁一d機關 或者係用炸彈引爆d炸彈花 呢度既boss係隻飛天章魚(?) 打法係掉d炸彈去d風口位度 等d風吹d炸彈上去炸佢 炸佢落地就後就衝前狂斬啦

22.打完左又拎到一隻新妖精 又要去闖海王之神殿喇= =(我預計之後起碼仲要打多一至兩次 感覺有d麻煩) 一直走落去d機關大致上都差唔多(牆上既眼,老鼠洞依然唔駛理) 不過由於多左炸彈用可以發現一d捷徑(例如落到去第一層可以直接用炸彈炸開d石黎踩機關拎鑰匙 唔駛兜大圈) 去到其中一層有6個碑 左上碑寫住”由我開始 由我終結” 右上碑寫住”我係第二” 左中碑寫住”睇到呢段文字會受咀咒” 右中碑寫住”呢度只需要注意4個碑” 左下碑寫”我係第3” 右下碑寫住”我係第4” 集合呢6句話既意思就可以去正中間度畫個圖 畫法如下:
１，５－＞２
　　　＼／
　　　／＼
　　３－－４ 要一筆畫 形成一個類似沙漏既圖案
畫完就可以開門入去 發現一張海圖 心水清既人見到呢張圖應該會即刻留意到張圖同實際張圖係上下對稱既 隻妖精之後會提示你諗下辦法將上下兩張圖合併埋去 呢個謎真係非常正 原來係要你合番埋部NDS(唔係關機呀= =") 再開番就OK

23.離開風之島再去大炮島買打撈用既鉗 個老板好似要求你出下聲黎決定幾錢 (我試過小小聲喂左一聲 佢收我1000 再試下大聲D喂 佢就收我200) 唔知係咪越大聲越平既 不過200算喇 我唔想嗌爆個mic= =

24.買左就可以去打撈番所有寶物 當然最重要就係去綠點度打撈太陽之鑰匙啦